पुणे : पुण्यात रविवारी रात्री गुंडांचा थरार पाहायला मिळाला. कारचा पाठलाग करुन दुचाकीवरून आलेल्यांनी फायरिंग केले. निलेश गायकवाड व त्याच्या साथीदारांनी एकाच्या कारवर शिवणे येथे गोळीबार करण्याची घटना घडली आहे. शिवणे स्मशानभूमी ते एनडीए रोडवर रविवारी रात्री पावणेदहा वाजता हा थरार रंगला होता. त्यात एक गोळी पाठीला लावून केदार भालशंकर जखमी झाला आहे.
याप्रकरणी केदार शहाजी भालशंकर (२४, रा. रामनगर, वारजे) याने फिर्याद दिली आहे. त्यावरुन निलेश गायकवाड व त्याच्या तीन ते चार साथीदारांवर गुन्हा दाखल केला आहे.
याबाबत पोलिसांनी दिलेल्या माहितीनुसार, केदार भालशंकर व त्याचे मित्र हर्षवर्धन मोहिते व आकाश शिंदे हे कारमधून रविवारी रात्री पावणेदहा वाजता घरी जात होते. यावेळी शिवणे स्मशान भूमी ते एनडीए रोड दरम्यान निलेश गायकवाड व त्याचे तीन ते चार साथीदार 3 दुचाकीवरुन आले.
भालशंकर याच्या गाडीचा पाठलाग करुन त्यांच्यावर फायरिंग केले. त्यातील एक गोळी भालशंकर याच्या पाठीला लागून तो गंभीर जखमी झाला. गोळीबाराचा आवाज ऐकून रस्त्यावरच्या लोकांचे लक्ष तिकडे गेल्यावर रस्त्यावरुन जाणार्‍या येणार्‍या लोकांना या गुंडांनी पळवून लावून दहशत निर्माण केली.
या घटनेची माहिती मिळाल्यावर उत्तमनगर, वारजे माळवाडी पोलीस ठाण्याचे अधिकारी, कर्मचार्‍यांनी घटनास्थळाला भेट दिली असून उत्तमनगर पोलीस ठाण्यात खुनाचा प्रयत्न केल्याचा गुन्हा दाखल करण्यात आला आहे.