पुणे : पुण्यातील मंगळवार पेठेत सराईत गुन्हेगाराला पकडण्यासाठी गेलेल्या पोलिस अधिकाऱ्यावरच सराईताने कोयत्याने वार केल्याचा प्रकार समोर आला आहे.
पोलीस उपनिरीक्षक नरेश वाडेवाले हे जखमी झाले आहेत. याप्रकरणी कुमार भागवत चव्हाण व प्रतिक पृथ्वीराज कांबळे (दोघेही रा. 251 मंगळवार पेठ) यांच्यावर गुन्हा दाखल करण्यात आला आहे.
प्रतीक हा पोलिसांच्या रेकॉर्डवरील गुन्हेगार आहे. मंगळवार पेठेत लावण्यात आलेले शासकीय कॅमेरे हलवले असल्याची माहिती पोलिसांना मिळाली होती. त्यानुसार उपनिरीक्षक नरेश व त्यांचे पथक या आरोपींना ताब्यात घेण्यासाठी गेले होते. यावेळी प्रतीक कांबळे याने फिर्यादी यांना मारण्याच्या उद्देशाने शिवीगाळ करत आता तुला जिवंत सोडत नाही, असे म्हणत हातातील लोखंडी कोयत्याने त्यांच्या अंगावर वार केले.
कुमार याने कर्मचाऱ्यांना विटाने मारहाण करून शासकीय कामात अडथळा निर्माण केला. पोलिसांनी गुन्हा दाखल करत कुमार याला अटक केली आहे. पण प्रतीक हा पसार झाला आहे. अधिक तपास फरासखाना पोलीस करत आहेत.