पिंपरी : वाईन शॉप मध्ये खरेदीसाठी रांगेत येण्यास सांगितल्याने चौघांनी मिळून वाईन शॉपमधील मॅनेजरला दमदाटी करत मालकाच्या डोक्यात दारूची बाटली फोडली. यामध्ये दुकान मालक गंभीर जखमी झाला आहे. त्यानंतर वाईन शॉपच्या गल्ल्यातील रक्कम चोरण्याचा देखील प्रयत्न केला. ही घटना 15 ऑक्टोबर रोजी रात्री सव्वासात वाजता रिगल वाईन शॉप, पिंपरी येथे घडली.
कीर्ती लक्ष्मण राजपूत (वय 28, रा. पिंपरी) यांनी याप्रकरणी मंगळवारी (दि. 19) पिंपरी पोलीस ठाण्यात फिर्याद दिली आहे. त्यानुसार चार जणांच्या विरोधात गुन्हा दाखल करण्यात आला आहे. या घटनेत मैनेजर मानसिंग ही जखमी आहे. कीर्ति राजपूत काल शुद्धीवर आल्यानंतर त्यांनी फिर्याद दिली. या घटनेतील चार ही आरोपी पोलिसांच्या ताब्यात असून चौकशी सुरु आहे.
पोलिसांनी दिलेल्या माहितीनुसार, फिर्यादी राजपूत यांचे पिंपरी येथे रिगल वाईन शॉप नावाचे दुकान आहे. त्या दुकानात जखमी मानसिंग हे मॅनेजर म्हणून काम करतात. दस-याच्या दिवशी रात्री सव्वासात वाजता चारजण वाईन शॉपमध्ये आले. मॅनेजर मानसिंग यांनी त्यांना रांगेत येण्यास सांगितले. त्यावरून चौघांनी मानसिंग यांच्यासोबत वाद घालून ओल्डमंक आणि व्हिस्की ही दारू मागितली.
काही रोख रक्कम आणि काही ऑनलाईन ट्रान्सफर करून आरोपींनी त्याचे पैसे दिले. त्यानंतर आरोपींनी मोठी दारूची बाटली पाहिजे असल्याचे सांगून वाद घालण्यास सुरुवात केली. त्यांना समजाविन्याचा प्रयत्न करत असलेले राजपूत यांच्या डोक्यात दारूची बाटली फोडून त्यांना जखमी केले. तसेच लोखंडी पाईप आणि सिमेंटचे गट्टू दुकानावर मारले. दुकानासमोर राडा घालून आरोपी दुचाकीवरून निघून गेले. पिंपरी पोलीस तपास करीत आहेत.