मुंबई : अभिनेता सुशांत सिंह आत्महत्या प्रकरणानंतर बॉलिवूड आणि ड्रग कनेक्शन किती खोलवर आहे हे संपूर्ण जगाच्या समोर आले आहे. यामध्ये एनसीबीने कारवाईचा फास आवळल्यानंतर अनेक फिल्म स्टार जाळ्यात अडकले. एनसीबीच्या जाळ्यात दाक्षिणात्य अभिनेत्री श्वेता कुमारी अडकली आहे. श्वेताला मुंबईजवळील एका हॉटेलमधून अटक करण्यात आली.
मिळालेल्या माहितीनुसार, एनसीबीने मुंबईच्या क्राउन बिझनेस हॉटेलवर छापा मारला. तेथून ४०० ग्रॅम एमडी जप्त करण्यात आले आहे. अभिनेत्री श्वेता कुमारी ही हैदराबाद येथील रहिवासी आहे. ती सध्या एनसीबीच्या ताब्यात आहे.
एनसीबीचे झोनल डायरेक्टर समीर वानखेडे यांनी सांगितले की, अटक अभिनेत्रीविरोधात एनडीपीएस अॅक्ट अंतर्गत गुन्हा दाखल करण्यात आला आहे. याशिवाय अनेक ड्रग तस्करांनाही अटक करण्यात आली आहे. तस्करांच्या टोळीचा पर्दाफाश करण्यासाठी या संपूर्ण प्रकरणात आर्थिक बाजूही तपासायला हवी, असे एनसीबीचे म्हणणे आहे.