पिंपरी : सातव्या मजल्याच्या गॅलरीमधून खाली पडल्याने १२ वर्षीय मुलाचा जागीच मृत्यू झाला आहे. अथर्व दीपक गावडे असे मृत्यू झालेल्या मुलाचे नाव आहे. ही घटना बुधवारी दुपारी चारच्या सुमारास पिंपरीमध्ये घडली.
पिंपरीमधील कोहिनुर या इमारतीच्या सातव्या मजल्यावर गावडे कुटुंब राहातं. मयत अथर्व आणि त्याचा लहान भाऊ हे दोघे गॅलरीमध्ये खेळत होते. तेव्हा, त्यांची आई घरकामात व्यस्त होती. दरम्यान, अथर्व गॅलरीवर चढला आणि तिथून खाली डोकावत होता. त्याचवेळी तोल जाऊन तो थेट सातव्या मजल्याच्या गॅलरीमधून खाली पडला. यात त्याचा जागीच मृत्यू झाला अस पोलिसांनी सांगितले.
दरम्यान, मोठा भाऊ खाली पडल्याने लहान भाऊ रडत होता. हे पाहून त्यांची आई गॅलरीमध्ये आली त्यावेळी ही गंभीर घटना समोर आली. या घटनेमुळे गावडे कुटुंबावर दुःखाचा डोंगर कोसळला आहे.