पिंपरी : शिवीगाळ केल्याचा जाब विचारण्यासाठी गेलेल्या महिलेला बेदम मारहाण करुन जबरदस्तीने मुत्र पाजण्याचा प्रयत्न केल्याची तक्रार हिंजवडी पोलीस ठाण्यात दाखल करण्यात आली आहे. मात्र, आता या प्रकरणात नवीन माहिती समोर आली आहे. फिर्यादी महिलेने आपण रागाच्या भरात अशी तक्रार दाखल केल्याचा लेखी जबाब पोलिसांना दिला आहे. महिलेच्या तक्रारीवरुन पोलिसांनी 4 महिलांसह 8 जणांवर गुन्हा दाखल केला होता.
महिलेच्या तक्रारीनुसार शेजारी राहणाऱ्या भावकीतील व्यक्तीकडून शिवीगाळ झाल्यानंतर संबंधित महिला सासऱ्यासोबत जाब विचारण्यासाठी गेली होती. आम्हाला शिवीगाळ का केली असा जाब तिने विचारला. त्यावेळी आरोपींनी महिला आणि तिच्या सासऱ्यांना लाथाबुक्क्या, चपला आणि काठीने बेदम मारहाण केली. एवढंच नाही तर आरोपींनी बाटलीत लघवी गोळा करुन आपल्याला पाजण्याचा प्रयत्न केला. त्यानंतर आरोपींनी महिलेला आणि सासऱ्यांना खोलीत डांबून ठेवल्याचे फिर्यादीत नमूद केले आहे.
हा प्रकार 15 मे रोजी सूसगाव या ठिकाणी घडला होता. घडलेल्या प्रकारामुळे महिला आणि तिचे सासरे तणावात होते. या धक्क्यातून सावरत महिलेने 21 मे रोजी पोलिसांत धाव घेतली आणि आरोपींविरोधात तक्रार दाखल केली.
महिलेच्या तक्रारीनंतर हिंजवडी पोलीस ठाण्यात चार महिलांसह आठ जणांवर विनयभंग आणि मारहाणीचा गुन्हा दाखल केला आहे. पुढील तपास सहायक पोलीस निरीक्षक गणेश खारगे करीत आहेत.