पिंपरी : “भाऊ, तुमच्यामुळे मी पुन्हा एकदा खासदार होऊ शकलो”, आमदार लक्ष्मण जगताप यांचे काल (दि. 11 जून) आभार व्यक्त करताना नवनिर्वाचित भाजप खासदार धनंजय महाडीक यांना गहिवरून आले. खासदार महाडीक यांनी विजयानंतर शनिवारी रात्री पिंपळे गुरव येथील आमदार जगताप यांच्या निवास्थानी भेट घेतली, त्यावेळी ते बोलत होते.
नवनिर्वाचित भाजप खासदार धनंजय महाडीक म्हणाले, “भाऊ, तुमच्यामुळे मी पुन्हा एकदा खासदार होऊ शकलो. तुमची पक्षनिष्ठा, लढवय्येपणा आणि प्रबळ इच्छाशक्ती भाजपच नाही तर सर्वच राजकीय पक्षाच्या कार्यकर्त्यांना कायम प्रेरणा देणारी आहे”, असे म्हणून जगताप यांच्यामुळे राज्यसभा निवडणुकीत भाजपचा विजय सुकर झाला अशा शब्दांत आभार व्यक्त केले.
“तुम्हाला उत्तम आरोग्य लाभो. पिंपरी-चिंचवडमधील जनतेच्या सेवेसाठी तुम्ही लवकरात लवकर पुन्हा नव्या जोमाने काम सुरू करा. आपल्याला पिंपरी-चिंचवड महापालिकेवर पुन्हा एकदा भाजपचा भगवा फडकवायचा आहे”, अशा भावनाही त्यांनी यावेळी व्यक्त केल्या.
दरम्यान, खासदारपदी निवड झाल्यामुळे आमदार लक्ष्मण जगताप यांनी धनंजय महाडीक यांचे अभिनंदन केले. यावेळी आमदार लक्ष्मणभाऊ जगताप यांचे बंधू, माजी नगरसेवक व भाजपचे चिंचवड विधानसभा निवडणूक प्रमुख शंकर जगताप, विजय जगताप व कुटुंबातील सर्व सदस्य उपस्थित होते. यावेळी जगताप कुटुंबियांच्या वतीने नवनिर्वाचित खासदार धनंजय महाडीक यांचे औक्षण करून अभिनंदन केले.