पिंपरी : त्रिवेणीनगर, तळवडे रस्त्यावरील
कॅनेरा बॅंकचे एटीएम जिलेटीनचा स्फोट घडवून उडविल्याची घटना घडली आहे. यामध्ये एटीएम सेंटरचे मोठे नुकसान झाले असून यातील पैसे मात्र सुरक्षित आहेत. पहाटेच्यावेळी झालेल्या या घटनेमुळे परिसरात एकच खळबळ उडली आहे.
मिळालेल्या माहितीनुसार त्रिवेणीनगर, तळवडे रोड येथे कॅनेरा बॅंकेचे एटीएम आहे. पहाटे साडेतीन वाजताच्या सुमारास दुचाकीवरून दोघेजण आले. त्यांनी जिलेटीनचा स्फोट घडवून एटीएम उडवून दिले. यामुळे एटीएम सेंटरचे मोठे नुकसान झाले. मात्र आतील रोकड सुरक्षित राहिली.
पहाटेच्यावेळी झालेल्या स्फोटामुळे नागरिक जागे झाले. यामुळे चोरटे दुचाकीवरून पळून गेले. घटनेची माहिती मिळताच पोलिसांचा मोठा फौजफाटा घटनास्थळी दाखल झाला आहे. याबाबत अधिक तपास चिखली पोलीस करीत आहेत.