पुणे : कोणत्याही रुग्णाला रात्री अपरात्री औषधाची गरज पडल्यास त्याला औषधे उपलब्ध व्हावीत, यासाठी शहरातील अनेक मेडिकल दुकाने रात्रभर उघडी असतात. याचाच गैरफायदा घेऊन मोटारसायकलवरुन आलेल्या दोघांनी पिस्तुलाचा धाक दाखवून एका मेडिकल दुकानाच्या गल्ल्यातील रोकड जबरदस्तीने चोरुन नेली.
याप्रकरणी उमेश चंद्रकांत यादव (२९, रा. नाईन ग्रीन अपार्टमेंट, हांडेवाडी रोड) यांनी कोंढवा पोलीस ठाण्यात फिर्याद दिली आहे. याबाबत पोलिसांनी दिलेल्या माहितीनुसार, उंड्री चौकात श्री स्वामी समर्थ मेडिकल दुकान आहे.
बुधवारी पहाटे उमेश यादव हे दुकानात होते. पहाटे २ वाजून ४७ मिनिटांनी मोटारसायकलवरुन दोघे जण दुकानात आले. त्यांनी फिर्यादी यांना पिस्टलसारखे हत्याराचा धाक दाखविला. गल्ल्यातील ५ हजार ५०० रुपयांची रोकड जबरदस्तीने चोरुन नेली. सीसीटीव्हीत चोरटे कैद झाले असून त्या अनुशंगाने पोलीस उपनिरीक्षक सोनवणे तपास करीत आहेत.