पिंपरी : गुन्ह्याच्या तपासात नाव आल्याने चौकशीसाठी ताब्यात घेण्यासाठी गेलेल्या पोलिसांच्या अंगावर गाडी घालून जीवे ठार मारण्याचा प्रयत्न केला. तसेच एका पोलिसाला फरपटत नेऊन जखमी केल्याची घटना पिंपरी चिंचवड शहरात घडली.
तुकाराम अर्जून मगर (३०, रा. गजानन नगर, काळेवाडी फाटा) याला अटक करण्यात आले आहे. पोलीस आयुक्त कृष्ण प्रकाश यांनी दिलेल्या माहितीनुसार, बनावट कागदपत्र तयार करून देणाऱ्या आरोपींना अटक करण्यासाठी सामाजिक सुरक्षा विभागाची तीन पथके तयार करण्यात आली. आरोपी तुकाराम मगर याच्याही मागावर पोलीस होते. काळेवाडी फाटा येथे पहाटे पाचच्या सुमारास चारचाकी वाहनातून आरोपी मगर जात होता. त्यावेळी पोलिसांनी हात दाखवून त्याचे वाहन थांबवले.
आम्ही पोलीस आहोत, असे पोलीस कर्मचारी संतोष बर्गे यांनी आरोपी मगर याला सांगितले. तुमचे पोलीस असल्याचे ओळखपत्र दाखवा, असे आरोपी मगर म्हणाला. बर्गे यांनी त्यांचे ओळखपत्र दाखविले. त्यावेळी आरोपीने गाडीच्या काचा एकदम जोरात वरती केल्या. त्यामुळे बर्गे यांचा हात अडकला. तरीही आरोपीने गाडी चालवून नेऊन १५ ते २० फुटांपर्यंत बर्गे यांना फरपटत नेले. यात ते जखमी झाले. तसेच गाडीसमोर उभे असलेले पोलीस कर्मचारी संदीप गवारी यांच्या अंगावर गाडी घालून जीवे ठार मारण्याचा प्रयत्न केला. पाठलाग करून पोलिसांनी त्याला ताब्यात घेतले.