पिंपरी : भरधाव वेगात जाणाऱ्या मालवाहू ट्रक चालकाचे गाडीवरील नियंत्रण सुटल्याने झालेल्या अपघातात दुचाकीवरील तरुण गंभीर जखमी झाला होता. तरुणावर खासगी रुग्णालयात उपचार सुरु असताना आज (मंगळवार) त्याचा मृत्यू झाला. हा अपघात निगडी येथील जगद्गुरु संत तुकाराम महाराज भक्ती-शक्ती पुलावर रविवारी (दि.11) झाला होता.
ओमकार शिवाजी खाडे असे मृत्यू झालेल्या तरुणाचे नाव आहे. रविवारी ओंकार भक्ती-शक्ती पुलावरून निगडीवरुन देहुरोडच्या दिशेने जात होता. त्याच्या मागे एक दुचाकी होती. एका मालवाहू ट्रकच्या चालकाचे वाहनावरील ताबा सुटल्याने दोन दुचाकींना पाठीमागून जोरात धडक बसली.
या अपघातात दोन दुचाकीवरील तीन युवक गंभीर जखमी झाले होते. दोन जणांना वायसीएम रुग्णालयात दाखल करण्यात आले होते. ओंकार खाडेला पिंपरीमधील एका खासगी रुग्णालयात उपचारासाठी दाखल करण्यात आले होते. आज उपचारादरम्यान त्याचा मृत्यू झाला. पुढील तपास निगडी पोलीस करत आहेत.