मुंबई : केंद्रीय अमली पदार्थविरोधी पथकाने (एनसीबी) कोर्डेलिया क्रूझवर केलेल्या छापेमारी प्रकरणासंदर्भात बोलताना काँग्रेसने काही गंभीर आरोप केले आहेत. क्रूझवर सापडलेले अमली पदार्थ आणि अभिनेता शाहरुख खानचा मुलगा आर्यन खानला झालेली अटक या प्रकरणावर भाष्य करताना काँग्रेसचे नेत्या आणि राष्ट्रीय प्रवक्त्या डॉ. शमा मोहम्मद यांनी एनसीबीचे अधिकारी या क्रूझ प्रकरणातील कारवाईच्या माध्यमातून छोट्या माश्यांच्या मागे लागले आहेत. मात्र त्याचवेळी गुजरातमधील मुंद्रा बंदरावर सापडलेल्या तीन हजार किलो हेरॉईनसंदर्भात ही केंद्रीय संस्था शांत आहे, अशी टीका केलीय.
“क्रूझवरील छोट्या माशांना पडकडण्यासाठी एनबीसी फार व्यस्त आहे. पण जेव्हा मोठ्या माशांची गोष्ट येते तेव्हा अदानींच्या मुंद्रा बंदरावरुन करण्यात आलेल्या तीन हजार किलो हेरॉईनसंदर्भात एनबीसी एकदम शांत आहे. एनसीबी असा राजाश्रय (किंगपिन्स) असणाऱ्यांच्या माध्यमातून चालवल्या जाणाऱ्या अमली पदार्थांच्या पुरवठ्याला संरक्षण का देत आहे आणि कोणाच्या आदेशानुसार देत आहे?,” असं शमा यांनी म्हटलं आहे.
आंतरराष्ट्रीय क्रूझ टर्मिनसवर ‘एनसीबी’ने शनिवारी ही कारवाई केली. एनसीबीच्या अधिकाऱ्यांनी शनिवारी, २ ऑक्टोबरला मुंबईहून गोव्याला जाणाऱ्या कार्डेलिया क्रूझवर छापा टाकला. त्यात पाच ग्रॅम मेफ्रेडॉन (एमडी), १३ ग्रॅम कोकेन, २१ ग्रॅम चरस, एमडीएमएच्या २२ गोळ्या व एक लाख ३३ हजारांची रोकड जप्त करण्यात आले आहेत. सशयितांच्या रक्ताचे नमुने न्यायवैद्यक प्रयोगशाळेत पाठवण्यात आले आहेत.
‘एनसीबी’ने आर्यन खानसह आठ जणांना चौकशीसाठी ताब्यात घेतले होते. दिवसभर नवी मुंबईसह आणखी काही ठिकाणी शोधमोहीम राबवून संशयित अमली पदार्थ विक्रेत्यांची चौकशी करण्यात आली आणि एकाला ताब्यात घेण्यात आले. रविवारी सकाळी ताब्यात घेण्यात आलेल्या आठ जणांना ‘एनसीबी’च्या अधिकाऱ्यांनी मुंबईतील कार्यालयात आणले आणि त्यांना अटक करण्यात आली. आरोपींविरोधात अमली पदार्थ प्रतिबंधक कायद्यानुसार गुन्हा दाखल करण्यात आला.
आर्यन खानसह, मूनमून धमेचा, नूपुर सारिका, इस्मित सिंग, मोहक जैस्वाल, विक्रांत चोकेर, गोमित चोप्रा, अरबाज र्मचट यांना अटक करण्यात आली आहे.