पुणे : अभिनेत्री केतकी चितळे हिने राष्ट्रवादी काँग्रेसचे अध्यक्ष शरद पवार यांच्यावर आक्षेपार्ह फेसबुक पोस्ट लिहिली आहे. ‘तुका म्हणे पवारा, नको उडवू तोंडाचा फवारा, ऐंशी झाले आता उरक, वाट पाहतो नरक,’ अशी वादग्रस्त फेसबुक पोस्ट केतकी चितळेने केली. केतकी चितळेनं केलेल्या या पोस्टवर राष्ट्रवादी काँग्रेसकडून नाराजी व्यक्त करण्यात आली असून तिच्याविरोधात पुणे राष्ट्रवादी युवक कॉंग्रेसने तक्रार दाखल केली आहे.
राष्ट्रवादीचे अध्यक्ष शरद पवार यांची अवहेलना करणारा मजकुर पोस्ट केल्याबाबत आणि संत श्रेष्ठ तुकाराम महाराजांची पण अवहेलना झाली आहे. यामुळे समस्त समाजाची भावना दुखावल्या आहेत. यामुळे अभिनेत्री केतकी चितळे हिच्यावर कडक कारवाई व्हावी, अशी मागणी पुणे राष्ट्रवादी युवक कॉंग्रेस छत्रपती शिवाजीनगर विधानसभा मतदारसंघाच्या वतीने करण्यात आली आहे.
याबाबत केतकी चितळे विरोधात सायबर क्राईम कार्यालयात तक्रार दाखल करण्यात आली आहे. यावेळी राष्ट्रवादी युवक कॉंग्रेस शिवाजीनगर विधानसभा मतदारसंघाचे अध्यक्ष अॅड. स्वप्निल जोशी, यश जगताप, प्रज्वल जैनाक उपस्थित होते.