पुणे : सासवड रस्त्यावर शिवशाही बस आणि कंटेनरचा भीषण अपघात झाल्याने सहा जण जखमी झाले. यामध्ये बसमध्ये अडकून पडलेल्या प्रवाशास अग्निशामक दलाच्या जवानांनी बाहेर काढले.
हा अपघात सोमवारी रात्री साडे बारा वाजता सासवड रस्त्यावर सोनाई हाॅटेल समोर झाला. अपघात झाल्यानंतर काही प्रवासी अडकल्याची माहिती अग्निशमन दलाला मिळाली. काळेबोराटे नगर अग्निशमन केंद्रातील वाहन वर्दिवर पाठवण्यात आले.
या ठिकाणी पंढरपूर स्वारगेट या शिवशाही बसचा ( MH14 GO 3104) आणि कंटेनरचा (MH18 AA 7190) झाला मोठा अपघात झाला. शिवशाही बसमधील ४ जखमींना नागरिकांनी बाहेर काढून जखमी अवस्थेत रुग्णवाहिकेतून रुग्णालयात पाठवले होते. तर कंटेनर ड्रायव्हरलादेखील रुग्णालयात रवाना केले होते.
अग्निशामक दलाच्या जवानांनी पाहणी केली असता शिवशाही बसमधे ड्रायव्हर सीटमागे एक जखमी व्यक्ती अडकला होता. तात्काळ अग्निशमन उपकरण फायर एक्स वापरत पाचच मिनिटात सीटवर अडकलेल्या व्यक्तीची सुटका करून त्याला रुग्णवाहिकेतून रुग्णालयात पाठविले. घटनास्थळी क्रेनची मदत आली असल्याने दोन्ही अपघातग्रस्त वाहने बाजूला केली.
घटनास्थळी एकूण जखमी व्यक्ती 6 असून काळेबोराटे नगर, कोंढवा बुद्रुक व अग्निशमन मुख्यालय येथील रेस्क्यु व्हॅन अशी 3 अग्निशमन वाहने वेळेत दाखल झाली होती. अपघाताचे कारण समजू शकले नाही. पुढील तपास पोलिस करीत आहेत.