पिंपरी : सुनेच्या डोक्यात हत्याराने मारहाण करून सासऱ्याने छतावरुन उडी मारुन आत्महत्या केल्याची धक्कादायक घटना घडली आहे. ही घटना शुक्रवारी (दि.20) रोजी दुपारी अडीचच्या सुमारास पराग ज्वेलर्सच्या पाठिमागे सृष्टी निवास थेरगाव येथे घडली आहे. सुनेवर हल्ला करण्याचे कारण अद्याप स्पष्ट झाले नाही.
सुशिल सुर्यकांत वनवे यांनी याबाबत वाकड पोलीस ठाण्यात फिर्याद दिली आहे. सुर्यकांत मारुती वनवे (74, रा. पराग ज्वेलर्सच्या पाठिमागे सृष्टी निवास, वेलठिकानगर थेरगाव) असे आत्महत्या केलेल्या आरोपीचे नाव आहे.
पोलिसांनी दिलेल्या माहितीनुसार,आरोपी सुर्यकांत हे फिर्यादी सुशील यांचे वडील असून त्यांनी शुक्रवारी दुपारी अडीचच्या सुमारास फिर्यादी सुशील यांची पत्नी यांना कोणत्यातरी अज्ञात कारणासाठी जिवे ठार मारण्याच्या उद्देशाने हत्याराने डोक्यावर मारहाण केली. त्यानंतर आरोपी सुर्यकांत याने स्वतः घराचे छतावरुन उडी मारुन आत्महत्या केली आहे. याप्रकरणी अधिक तपास वाकड पोलीस करीत आहेत.