सोलापूर : रिझर्व्ह बँकेने दोन हजार रुपयांच्या नोटा जमा करण्यास सांगितल्यानंतर १५ दिवसांतच शहरातील बँकांकडे ६ लाख ७० हजार ४५६ नोटा जमा झाल्या. नागरिक १३४ कोटी ९ लाख रुपये जमा करून त्या बदल्यात ५०० रुपयांच्या नोटा घेऊन गेले.
७ जूनपर्यंत पहिल्या १५ दिवसांत इतकी मोठी रक्कम जमा झाल्याने उर्वरित साडेतीन महिन्यांत आणखी मोठी रक्कम जमा होण्याची शक्यता आहे. चलनात असलेल्या २ हजार रुपयांच्या नोटा रिझर्व्ह बँकेने २३ मे ते ३० सप्टेंबरपर्यंत बँकेत जमा करण्याचे आदेश दिले. त्यानुसार नोटा जमा झाल्या.
२ हजार रुपयांच्या १० नोटा बँकेत जमा करून त्या बदल्यात १०० वा ५०० रुपयांच्या नोटा दिल्या जात आहेत. पण त्यासाठी कोणत्याही बँकेत गर्दी दिसत नाही. शहरातील प्रमुख बँकांकडे २ हजार रुपयांच्या नोटा जमा केल्या जात आहेत.
यामध्ये स्टेट बँक, बँक ऑफ इंडिया, महाराष्ट्र बँक, बडोदा बँकेसह इतर बँकांमध्ये ही मोठी रक्कम जमा झाली आहे. रिझर्व्ह बँकेच्या नियमानुसार नोटा जमा करून घेतल्या जात असल्याचे अग्रणी बँकेचे व्यवस्थापक प्रशांत नाशिककर यांनी सांगितले.