राणे नेमके कोणत्या पाटलांबद्दल बोलले, कल्पना नाही : सुळे

मुंबई : राष्ट्रवादी काँग्रेसचे नेते जयंत पाटील यांच्या भाजपा प्रवेशाबद्दल भाजपचे खासदार नारायण राणे यांनी गौप्यस्फोट केला होता. यावर बोलताना खासदार सुप्रिया सुळे यांनी ‘राजकारणात अनेक जयंत पाटील आहेत. राणे नेमकं कोणत्या पाटलांबद्दल बोलले मला कल्पना नाही,’ अशा शब्दांत राणेंच्या दाव्याची खिल्ली उडवली आहे.

‘आज महाविकास आघाडीचं सरकार नसतं तर जयंत पाटील हे भाजपमध्ये असते. जयंत पाटील यांची भाजपच्या वरिष्ठ नेत्यांशी बोलणी झाली होती,’ असा दावा नारायण राणे यांनी अलीकडेच एका पत्रकार परिषदेत केला होता. त्यामुळं उलटसुलट चर्चेला उधाण आलं होतं. पदवीधर निवडणुकीच्या मतदानासाठी बारामतीतील मतदान केंद्रावर आलेल्या सुप्रिया सुळे यांना या संदर्भात पत्रकारांनी विचारलं. त्यावर त्या म्हणाल्या, ‘राणे नेमकं कोणत्या जयंत पाटलांविषयी बोलले मला माहीत नाही. महाराष्ट्रातील राजकारणात अनेक जयंत पाटील आहेत. मी स्वत: चार-पाच जयंत पाटलांना ओळखते. ते राष्ट्रवादीच्या जयंत पाटलांविषयी बोलले असतील असं वाटत नाही.’

जयंत पाटील यांनी आधीच राणेंचा हा दावा फेटाळून लावला आहे. ‘मी शरद पवारांचा कार्यकर्ता असल्यानं माझ्या मनाला असा विचार कधी शिवतही नाही. भाजपच्या कुठल्याही वरिष्ठ नेत्यांशी माझी चर्चा झाली नव्हती आणि राणे यांची गणती भाजपच्या वरिष्ठ नेत्यांमध्ये होत नाही हे जाणून खेद वाटला. माझी नेमकी कुठल्या नेत्याशी, कुठं चर्चा झाली होती याचा तपशील कळला तर माझ्या ज्ञानात भर पडेल,’ असं ते म्हणाले होते.