टोकियो : ऑलिम्पिकमध्ये जगभरातील देश सहभागी झाले. यामध्ये लोकसंख्येच्या बाबतीत चीन आणि भारतासारख्या तर क्षेत्रफळानुसार सर्वात मोठ्या रशिया आणि कॅनडासारख्या देशांतील खेळाडूही आले होते. तर काही चौरस किलोमीटर क्षेत्रफळ असलेल्या देशातील खेळाडूही पदकांसाठी लढताना दिसले. याच लहान देशांपैकी एक सॅन मारिनो. या देशाने टोकियो ऑलिम्पिकमध्ये तीन पदके जिंकली आहेत. त्यांच्याकडे एक रौप्य आणि दोन कांस्यपदके आहेत.
तुम्हाला हे जाणून आश्चर्य वाटेल की, सॅन मारिनोने केवळ पाच खेळाडूंना टोकियो ऑलिम्पिकसाठी पाठवले होते. तसेच दोन मिश्र खेळांमध्ये भाग घेतला होता.
सॅन मारिनोने टोकियो ऑलिम्पिकमध्ये कांस्य पदकासह आपले खाते उघडले. एलसेंड्रा पेरिलीने महिला ट्रॅप स्पर्धेत कांस्य जिंकले. महत्त्वाची गोष्ट म्हणजे सॅन मारिनोच्या इतिहासातील हे पहिले ऑलिम्पिक पदक ठरले. 29 जुलै रोजी पहिलं पदक जिंकल्यानंतर दोनच दिवसांनी म्हणजे 31 जुलै रोजी दुसरे पदकही पटकावले.
एलसेंड्रा पेरिली आणि जियान मार्को बेरेट्टीने नेमबाजी मिश्र संघ स्पर्धेचे रौप्य पदक पटकावले. त्यानंतर 5 ऑगस्ट रोजी कुस्तीपटू माइल्स अमीनने कांस्य जिंकले. हा तोच माइल्स आहे ज्याने कांस्य पदकाच्या लढतीत भारताच्या दीपक पुनियाला हरवले होते.
सॅन मारिनो हा ऑलिम्पिकमध्ये पदक जिंकणारा जगातील सर्वात लहान देश ठरला आहे. या देशाची एकूण लोकसंख्या फक्त 34 हजार इतकी आहे. युरोप खंडातील इटलीच्या मध्यभागी हा देश वसला आहे. सॅन मारिनोने 1960 मध्ये पहिल्यांदा ऑलिम्पिक खेळांमध्ये भाग घेतला होता. त्यानंतर त्यांच्या नऊ खेळाडूंनी सायकलिंग, नेमबाजी आणि कुस्ती यांसारख्या स्पर्धांमध्ये भाग घेतला, पण त्यापैकी कोणीही 16 व्या स्थानापेक्षा वरील स्थान गाठू शकले नव्हते.
2012च्या लंडन ऑलिम्पिकमध्ये सॅन मारिनोला पदक मिळाले असते. एलसेंड्रा पेरिलीने महिला ट्रॅपमध्ये तीन खेळाडूंसह संयुक्त दुसऱ्या स्थानी होती. पण शूट-ऑफमध्ये तिची कामगिरी घसरली आणि ती चौथ्या क्रमांकावर राहिली. त्यामुळे हा देश पदक जिंकू शकला नाही. 2016 च्या ऑलिम्पिकमध्येही पेरिलीला पदक जिंकता आलं नाही, पण यावेळी तिने योग्य लक्ष्याचा वेध घेत देशाला पहिले ऑलिम्पिक पदक मिळवून दिले.
2021च्या टोकियो ऑलिम्पिकमध्ये सॅन मारिनोच्या एलसेंड्रा पेरिली, जियान मार्को बेरेट्टी, माईल्स अमाईन यांच्याशिवाय जलतरणमध्ये एरियाना वालोनी आणि 90 किलो वजनी गटात जुडोका पाउलो पॅरासोग्लिया यांनी सहभाग घेतला होता. वलोनी 800 मीटर जलतरण स्पर्धेच्या पहिल्या फेरीतून बाहेर पडली. तर पॅरासोग्लिया यांना उपांत्यपूर्व फेरी गाठता आली नाही.