स्थानिक गुन्हे शाखेने तपास करून या हत्येच्या घटनेचा छडा लावला. या प्रकरणात १३ जणांना पोलिसांनी अटक केली असून, यात मुख्य तक्रारदारासह चार महिलांचा समावेश आहे. अप्पर पोलीस अधीक्षक धीरज पाटील यांनी आज, सोमवारी ही माहिती दिली.
पोलिसांनी दिलेल्या माहितीनुसार, फलटण तालुक्यातील पिंपरद गावच्या हद्दीतील म्हारकी शिवारातील गट क्रमांक तीनमधील वादग्रस्त जमिनीमध्ये माहुली उर्फ मौली झबझब पवार हिने झोपडी उभारली होती. तिचा १० तारखेला कुंडलिक कृष्णा भगत, सतीश उत्तम भगत, राजू प्रल्हाद मोरे, कुमार मच्छिंद्र मोरे व सुनील मोरे (सर्व राहणार पिंपरद) यांनी खून केल्याची फिर्याद कल्पना अशोक पवार (रा. अलगुडेवाडी, ता. फलटण) हिने दिली होती. यावरून वरील आरोपींना पोलिसांनी ताब्यात घेतले होते. दरम्यान, फिर्यादी कल्पना पवार हिने दिलेल्या तक्रारीत आणि साक्षीदारांच्या जबाबात तफावत असल्याचे पोलिसांच्या लक्षात आले.
या गुन्ह्याचे गांभीर्य लक्षात घेवून पोलीस अधीक्षक अजयकुमार बन्सल व अप्पर पोलीस अधीक्षक धीरज पाटील यांनी स्थानिक गुन्हे शाखेचे पोलीस निरीक्षक किशोर धुमाळ यांना गुन्ह्याची सत्यता पडताळणी करण्याच्या सूचना केल्या. यावरून स्थानिक गुन्हे शाखेचे सहाय्यक पोलीस निरीक्षक रमेश गर्जे यांच्या नेतृत्वाखाली विशेष पथकाची नेमणूक करण्यात आली.
सदर पथकाने गुन्ह्याचा समांतर तपास करताना नमूद आरोपी, त्यांच्या घरातील लोक, प्रत्यक्षदर्शी व आजूबाजूच्या परिसरातील व गावातील रहिवाशी यांच्याकडे विचारपूस केली असता, हा गुन्हा फिर्यादीने नमूद केलेल्या लोकांनी केला नसल्याचे निदर्शनास आले. यावरून पोलिसांनी आपल्या खबर्‍यांकडून माहिती मिळवली. गुन्हा घडला त्या दिवसांपासून फिर्यादी कल्पना पवार हिची दोन मुले पसार झाली आहेत. दोन्ही मुले ही अलगुडेवाडी गावच्या परिसरातील ऊसाच्या शेतात राहात असल्याची माहिती पोलिसांना मिळाली.
त्यावरून पोलिसांनी ऊसाच्या शेतात सापळा लावून सतत दोन दिवस पाठपुरावा केला. १२ फेब्रुवारीला सकाळी ७ वाजण्याच्या सुमारास संशयित मुलांपैकी एक जण बाहेर आला. त्याला पकडण्याचा प्रयत्न केला असता, तो उसाच्या पिकात पसार झाला. मात्र पोलिसांनी पाठलाग करून त्याला पकडले. त्याने भाऊही त्याच परिसरात असल्याची माहिती दिली. पोलिसांनी त्याला मांगोबा माळ येथून ताब्यात घेतले. त्यांच्याकडे विचारणा केल्यानंतर त्यांनी सुरुवातीला उडवाउडवीची उत्तरे दिली. मात्र, पोलिसी खाक्या दाखवताच, त्यांनी गुन्ह्याची कबुली दिली.
फिर्यादी व तिच्या घरातील जवळच्या नातेवाइकांनी १० तारखेला संध्याकाळी साडेसात वाजता माहुली उर्फ मौली झबझब पवार हिच्या पाठीवर धारदार शस्त्राने वार करून, तिच्या डोक्यामध्ये दगड घालून तिला ठार मारले. झोपडीतील साहित्य अस्ताव्यस्त केले. तसेच स्वत:ला जखमा करून गुन्ह्याचा खोटा बनाव रचल्याची कबुली आरोपींनी दिली. दरम्यान, या गुन्ह्यातील खर्‍या आरोपींवर यापूर्वी खून, खुनाचा प्रयत्न, खंडणी, जबरी चोरी, मारामारी असे गंभीर गुन्हे दाखल आहेत.