रेल्वे अपघाताबाबत विचाराल तर मोदी म्हणतील काँग्रेसने हे 60 वर्षांपूर्वी केले : राहुल गांधी

अमेरिका : राहुल गांधी यांनी त्यांच्या अमेरिका दौऱ्याच्या सहाव्या दिवशी न्यूयॉर्कमध्ये भारतीय वंशाच्या लोकांना संबोधित केले. न्यूयॉर्कमधील जॅविट्स सेंटरमध्ये हा कार्यक्रम झाला. राहुल यांना ऐकण्यासाठी 5 हजार अनिवासी भारतीय जमा झाले. राहुल यांनी येथे 26 मिनिटे भाषण केले. राहुल यांच्या भाषणापूर्वी ओडिशा रेल्वे अपघातातील मृतांना श्रद्धांजली वाहण्यात आली.

राहुल गांधी यांनी भारतीय वंशाच्या लोकांना सांगितले की, पंतप्रधान मोदी देशाला मागे घेऊन जात आहेत. ते म्हणाले- तुम्ही सगळे गाडीत बसून या कार्यक्रमाला आलात, जर तुम्ही फक्त रियर व्ह्यू मिरर बघूनच गाडी चालवलीत तर तुम्हाला नीट चालवता येईल का? एकामागून एक अपघात होतच आहेत. पण पंतप्रधान मोदी देशाची गाडी अशाप्रकारेच चालवत आहेत. ते फक्त मागे पाहत असून नंतर चकित होत आहेत की वारंवार अपघात का होत आहेत.

आरएसएस आणि भाजप मागचा विचार करतात. त्यांना काहीही विचारा, ते मागे वळून पाहू लागतात. रेल्वे अपघात कसा झाला हे त्यांना विचारा, ते म्हणतील 50 वर्षांपूर्वी काँग्रेस सरकारने केले. त्यांना विचारा की तुम्ही पाठ्यपुस्तकातून पीरियॉडिक टेबल का काढले, ते म्हणतील की काँग्रेसने 60 वर्षांपूर्वी केले होते.

राहुल म्हणाले की, मी तुमच्यावर खूप प्रेम करतो. आय लव्ह यु !. यानंतर राहुल यांनी विचारले की, तुम्ही कधी भाजपच्या सभेत ऐकले आहे का, की लोकांनी एकमेकांना आय लव्ह यु असे म्हटले आहे? काँग्रेसच्या सभांमध्ये हे सर्रास आहे. म्हणूनच मी म्हणतो की आपण द्वेषाच्या बाजारात प्रेमाचे दुकान चालवायला आलो आहोत.
राहुल म्हणाले की, तुम्हा सर्वांना येथे पाहून मला अभिमान वाटतो. तुमची नम्रता पाहून मला आनंद झाला. तुम्ही सर्व अनिवासी भारतीय अमेरिकेत आलात तेव्हा तुम्ही तुमचा अहंकार सोबत आणला नाही. तुम्ही मर्यादित संसाधनांसह येथे आलात आणि त्यातून सर्वोत्तम कामगिरी केली. तुम्हा सर्वांचा प्रवास अनोखा आहे. ते कोणापेक्षा कमी किंवा जास्त नाही.

राहुल म्हणाले की, देशात दोन विचारधारांमध्ये लढाई सुरू आहे. त्यात एका बाजूला महात्मा गांधी आणि दुसऱ्या बाजूला नथुराम गोडसे आहेत. गोडसेने गांधींना मारले कारण ते त्यांच्या जीवनावर समाधानी नव्हते. त्याला आपला राग कोणावर तरी काढायचा होता, म्हणून त्याने भारताच्या आत्म्याचे प्रतिनिधित्व करणाऱ्या व्यक्तीची निवड केली.

ते म्हणाले की, महात्मा गांधी आधुनिक होते, ते भविष्याविषयी बोलायचे.. गोडसे भित्रा होता, तो फक्त भूतकाळाबद्दल बोलत असे. भाजपचा या विचारसरणीवर विश्वास आहे. आम्ही महात्मा गांधींच्या सत्य आणि अहिंसेच्या विचारसरणीचे पालन करतो.

राहुल म्हणाले की, भाजप आणि पंतप्रधान मोदी त्यांच्या चुकांसाठी इतरांना दोष देतात. काँग्रेस सरकारच्या काळात रस्ते अपघात झाले, तेव्हा काँग्रेसने कधीही ब्रिटिशांच्या चुकीमुळे घडले असे म्हटले नाही. या अपघाताची जबाबदारी घेत काँग्रेसच्या रेल्वेमंत्र्यांनी पदाचा राजीनामा दिला होता.

ते म्हणाले की महात्मा गांधी हे अनिवासी भारतीय होते आणि आम्हाला ऐकायला आवडणार नाही पण देशाचा स्वातंत्र्यलढा दक्षिण आफ्रिकेत सुरू झाला. माझे आजोबा नेहरू जी NRI होते, आंबेडकर जी एनआरआय होते, सरदार पटेल आणि सुभाषचंद्र बोस एनआरआय होते. ते लोक त्या काळात अमेरिका, युरोपात गेले आणि त्यांना वाटले की इथे काही चांगल्या कल्पना आहेत, त्या भारतात घेऊन जाऊ शकतात. या सर्व व्यक्तिमत्त्वांच्या तुम्ही नवीन पिढी आहात म्हणून मला तुमच्याकडून हीच अपेक्षा आहे.